Nikolay Qumilyov

                  SONET

                                Tərcümə edəni Heydər Orucov

Görünür xəstəyəm: qəlbimdə duman,

Hər şey, hər söz-söhbət qəlbimi sıxır.

Yuxuma girirlər yanar almazlar,

Bir də qana batmış önlü yatağan.

Mənə elə gəlir /bu deyil yalan,

Babam olub mənim qıyıqgöz tatar,

O mərhəmətsiz hun… Məni bu azar

Əsrlərdən keçib çulğayıb yaman.

Susur, darıxıram, görürəm: budur

Yandırır qayanı günəşin odu.

Ağappaq ağarıb dəniz köpükdən,

Mavi gümbəzlərlə bəzənmiş şəhər,

Bağlarında təzə açmış çiçəklər –

Vuruşmuşduq orda… Və... ölmüşdüm mən.